گلگت (ای این این )ہفتہ کے روز پائلٹ ان کمانڈ کیپٹن مریم گل نے ڈپٹی کمشنر گلگت اور ہوم سیکریٹری کو پروازوں کی لینڈنگ ایریا میں درختوں کی کٹائی نہ کرنے کے حوالے سے شکایت درج کرادی ۔ جس پر ڈپٹی کمشنر نے اسسٹنٹ ڈائریکٹر یاسر اقبال کو طلب کرکے وضاحت مانگی۔انہوں نے کہا کہ اس سے قبل بھی پروازیں یہاں لینڈ کرتی رہی ہیں اورانتظامیہ کے تعاون سے تمام درختوں کو کاٹا گیا ہے صرف 5درخت باقی رہ گئےہیں۔جن کی کٹائی کے لئے ائیرپورٹ منیجر اور ضلعی انتظامیہ کو تحریری رپورٹ ارسال کردی ہے ۔
فلائٹ کے گزرنے کے بعد ڈپٹی کمشنر نے اسسٹنٹ ڈائریکٹر یاسر اقبال کی گرفتاری کے احکامات جاری کردئے جس پر ائیرپورٹ تھانہ گلگت نے اسسٹنٹ ڈائریکٹر کو گرفتار کرکے پانچ گھنٹوں تک حوالات میں رکھا ۔ سول ایوی ایشن گلگت اور اہلخانہ کی مداخلت کے بعد مذاکرات کئے گئے، جس پر اسسٹنٹ ڈائریکٹر کو دوبارہ رہا کردیا گیا تاہم ڈپٹی کمشنر نے اس موقع پر اسسٹنٹ ڈائریکٹر کو کہا کہ گزشتہ درختوں کی کٹائی کے مدمیں تین لاکھ روپے انتظامیہ کے اکاؤنٹ میں جمع کرایا جائے، نہ ہونے کی صورت میں نہ صرف ائیرپورٹ منیجر کو گرفتار کیا جائیگا بلکہ گلگت ائیرپورٹ کو بھی مکمل سیل کردیا جائیگا۔
اسسٹنٹ ڈائریکٹر یاسر اقبال نے اس حوالےسے سول ایوی ایشن کے حکام بالاکو تحریری رپورٹ میں بتایا ہے کہ گزشتہ درختوں کی کٹائی کے حوالے سے ضمانت دینے کے اختیارات میرے پاس نہیں ہے اور پائلٹ ان کمانڈ کیپٹن مریم گل کی جانب سے ادارتی قوانین کی دھجیاں اڑاتے ہوئے ہوم سیکریٹری گلگت بلتستان اور ڈپٹی کمشنر کو شکایتی درخواست دی گئی ہے ۔ اگر پائلٹ ان کمانڈ کو پرواز کی لینڈنگ میں مسئلہ درپیش تھا تو ٹریفک کنٹرولر کے علم میں لے آتی جبکہ اس سے قبل بھی پروازیں لینڈکرچکی ہیں۔
