وانا(رپورٹ: مجیب الرحمٰن وزیر/) ای این این ایس) جنوبی وزیرستان کی تحصیل برمل کے علاقہ مانڑہ میں نامعلوم ملزمان نے فائرنگ کرکے قبائلی مشر سمیت 4 افراد کو قتل جبکہ ایک مزدور کو زخمی کردیا۔
ذرائع کے مطابق قبائلی مشر سرمرجان المعروف سرمائی خان صبح گھر سے شاہ عالم بازار جارہا تھا کہ راستے میں ایک کار میں سوار نامعلوم ملزمان نے فائرنگ کردی، فائرنگ کے نتیجہ میں قبائلی ملک سرمرجان المعروف سرمائی، اس کا بھتیجا اسلم خان اور دیگر 2 افراد جاں بحق ہوگئے ہیں، جبکہ سرمرجان کا بیٹا حضرت عمر شدید زخمی ہوگیا ہے، جن کو فوری طورپر شیخ فاطمہ ہسپتال شاہ عالم منتقل کردیا گیا۔
قتل ہونے والے 2 مزدوروں کا تعلق لکی مروت سے بتایا جارہا ہے، جو کہ قبائلی مشر(ملک)سرمرجان کے ساتھ ایک سرکاری ٹیوب ویل پر کام کررہے تھے۔
دوسری جانب ڈی پی او شفقت علی کا کہنا ہے کہ ملک سرمرجان کا قتل پرانی دشمنی کا شاخسانہ ہوسکتا ہے، تاہم تفتیش کی جارہی ہے اور ملزمان کو جلد گرفتار کر لیا جائیگا۔
