سنڌ حڪومت ۽ عزيز ميمڻ جو لاڳاپيل صحافتي ادارو پونيئرن کي معاوضو ادا ڪري، قاتل گرفتار ڪریو

حيدرآباد(اي این این ایس) حيدرآباد يونين آف جرنلسٽس جي اگزيڪيوٽو ڪائونسل جو اجلاس صدر اقبال ملاح جي صدارت هيٺ ٿي گذريو, اجلاس ۾ اظهار راء جي آزادي سميت صحافين کي درپيش معاملن جو جائزو وٺندي محرابپور ۾ شهيد ٿيل صحافي عزيز ميمڻ جي قتل جي سخت لفظن ۾ مذمت ڪندي چيو ويو ته پوليس جاچ ۾ سست آهي جنهن ڪري ايترا ڏينهن گذرڻ باوجود قاتل ۽ قتل جو ڪارڻ وائکو نه ٿي سگهيو آهي.
اجلاس ۾ گهر ڪئي وئي ته قاتلن کي گرفتار ڪري قانون جي ڪٽهڙي ۾ آندو وڃي.
هنن سنڌ حڪومت ۽ شهيد عزيز ميمڻ جي لاڳاپيل صحافتي اداري کان گهر ڪئي ته سندس پونيئرن کي معاوضو ادا ڪئي وڃي, اجلاس ۾ پاڪستان حڪومت پاران سوشل ۽ ڊجيٽل ميڊيا لاء جوڙيل قانون کي اظهار راء جي آزادي تي حملو قرار ڏيندي ان کي رد ڪري ڇڏيو ۽ فيصلو ڪيو ويو ته ان سلسلي ۾ ستت ئي حيدرآباد ۾ ملڪي سطح جو سيمينار منعقد ڪيو ويندو. اجلاس ۾ ٽنڊوالهيار ۾ منشيات فروش پاران صحافي نوراحمد ٿيٻو مٿان وحشياڻو تشدد ڪري شديد زخمي ڪرڻ جي مذمت ڪندي اعلی پوليس اختيارين کان جوابدارن کي گرفتار ڪرڻ جي گهر ڪئي وئي.
اجلاس ۾ پي ايف يو جي, جي اسسٽنٽ سيڪريٽري جنرل خالد کوکر, ميمبر ايف اي سي لالا رحمان سمون, منصور مري, جئ پرڪاش، ولي محمد لنڊ, فريد لاکو, سميرا مختيار, رمضان شورو ۽ ٻين شرڪت ڪئي.