کورونا سے ہلاکتوں کی تعداد 400 سے تجاوز کر گئی، بیمار والد کو اسپتال منتقل کرنے سے گھر پر رہ جانے والا معذور بچہ بھوک سے مرگیا

کراچی(ای این این ایس/م ڈ) چین میں کورونا وائرس کے شکار والد کو قرنطینہ میں لے جانے کے باعث گھر میں اکیلا رہ جانے والا معذور بچہ ایک ہفتہ تک موت سے لڑتے لڑتے ہلاک ہوگیا۔ چین کے صوبے ہوبئی میں 16 سالہ معذور بچہ یان شینگ اپنے والد اور بھائی کے ساتھ رہتا تھا۔
یان شینگ کا والد اس کی دیکھ بھال کرنے والا واحد شخص تھا تاہم ایک ہفتے قبل اس کے والد اور بھائی میں کورونا وائرس کی تصدیق ہوئی جس پر حکام نے دونوں کو زبردستی کورونا وائرس سے متاثرہ مریضوں کے اسپتال منتقل کردیا۔
گھر پر اکیلا رہ جانے والا یان شینگ ایک ہفتے بعد موت کے منہ میں چلا گیا۔میڈیکل رپورٹ کے مطابق اس ایک ہفتے کے دوران وہ صرف دو بار ہی کچھ کھا سکا۔
چینی حکومت نے غفلت کا مظاہرہ کرنے پر دو افسران کو برطرف کردیا ہے۔
خیال رہے کہ چین میں خطرناک کورونا وائرس پھیل رہا ہے جس کا آغاز ووہان شہر سے ہوا اور اب وہ دیگر شہروں میں بھی پھیل رہا ہے۔کورونا وائرس سے اب تک چین میں 425 افراد ہلاک ہوچکے ہیں جبکہ ایک شخص ہانگ کانگ اور ایک فلپائن میں ہلاک ہوچکا ہے۔
کورونا وائرس سے صرف چین میں 20 ہزار 438 افراد متاثر ہیں۔