کراچی(ای این این ایس) کونسل آف پاکستان نیوزپیپر ایڈیٹرز (سی پی این ای) کے صدر عارف نظامی نے وزیر اعظم کی معاون خصوصی برائے اطلاعات و نشریات فردوس عاشق اعوان کی جانب سے میڈیا ٹریبونلز کے قیام سے متعلق دوبارہ اعلان پر سخت تشویش کا اظہار کرتے ہوئے اسے بدنیتی پر مبنی امتیازی اور جمہوریت دشمن اقدام قرار دیا ہے۔
انہوں نے کہا کہ میڈیا پہلے ہی غیر اعلانیہ شدید پابندیوں اور دباؤ کا شکار ہے وہاں میڈیا ٹریبونلز کے ذریعے مزید پابندیوں اور دباؤ میں جکڑنے کی کوشش کی جا رہی ہے جو ملک میں جمہوری کلچر کے استحکام، تحریر و تقریر اور اظہار کی آزادی جیسے بنیادی حقوق کے فروغ میں رکاوٹ ثابت ہوگا۔
عارف نظامی نے آل پاکستان نیوزپیپرز سوسائٹی، پاکستان فیڈرل یونین آف جرنلسٹس اور پاکستان براڈ کاسٹرس ایسوسی ایشن سمیت تمام میڈیا تنظیموں سے اپیل کی ہے کہ وہ اس عفریت کا مقابلہ کرنے کے لئے متحد ہو کر مشترکہ لائحہ عمل تیار کریں۔
دریں اثناء اس سلسلے میں سی پی این ای کا 19ستمبر 2019ء بروز جمعرات کراچی میں اجلاس طلب کیا گیا ہے۔
